22.8.09

20. "പ്രേമ ലതകള്‍”




‘ഞങ്ങള്‍ കുട്ടികള്‍’ സ്ക്കൂളില്‍ പോകുന്നത് നേര്‍വഴിയിലൂടെയാണെങ്കിലും തിരിച്ച് വീട്ടിലേക്ക് വരുന്നത് വളഞ്ഞ വഴിയിലൂടെയായിരിക്കും. അങ്ങനെ വളഞ്ഞ വഴി വരുന്നത്‌കൊണ്ട് മെച്ചം ഉണ്ട്. വീട്ടില്‍ തിരിച്ചെത്തുമ്പോള്‍ ഞങ്ങള്‍ക്ക് ഒരിക്കലും വിശപ്പ് ഉണ്ടാകാറില്ല. നെല്ലിക്ക പേരക്ക ചക്ക മാങ്ങ കശുമാങ്ങ ആദിയായവ കൂടാതെ പേരറിയാത്ത ധാരാളം ചെറുപഴങ്ങള്‍; എല്ലാം തിന്ന് വിശപ്പടങ്ങും. പിന്നെ വഴിക്കു കാണുന്ന എല്ലാ വീട്ടിലെയും കിണറ്റിലെ വെള്ളം കുടിക്കാറുണ്ട്. കശുവണ്ടി സീസണായാല്‍ പ്രാധാന ഐറ്റം കശുമാങ്ങ തന്നെ. ‘അണ്ടി, മരത്തിന്റെ ഉടമയുടെ വീട്ടില്‍ കൊടുത്ത് മാങ്ങ തിന്നാം’ എന്നാണ് നിയമമെങ്കിലും തരം കിട്ടിയാല്‍ അണ്ടി പോക്കറ്റിലാക്കി (അന്ന് പാവാടക്കും പോക്കറ്റുണ്ടായിരുന്നു) അത് വഴിയിലുള്ള പീടികയില്‍ കൊടുത്ത് വെല്ലം വാങ്ങിത്തിന്നും. (നാട്ടിന്‍‌പുറത്തുള്ള നാടന്‍ പീടികയില്‍ നാരങ്ങമിഠായിപോലും കിട്ടുകയില്ല).
...
ആറാം ക്ലാസ്സില്‍ പഠിക്കുന്ന കാലത്തെ ഒരു ദിവസം…. സ്ക്കൂള്‍ വിട്ടപ്പോള്‍ ഞങ്ങള്‍ നാല് പെണ്‍‌കുട്ടികള്‍ പതിവുപോലെ ഇടവഴികടന്ന് അടുത്ത പറമ്പത്തെ മാങ്ങയും ചെക്കിപഴവും മുള്ളിക്കായും തിന്ന്, കിണറ്റിലെ വെള്ളം വലിച്ച് കുടിച്ച ശേഷം മതില് കയറിമറിഞ്ഞ് അടുത്ത പറമ്പിലെത്തിയപ്പോഴാണ് അത് കാണുന്നത്. ‘കുറേ അണ്ടിമാങ്ങ മരച്ചുവട്ടില്‍ വീണു കിടക്കുന്നു’. (അണ്ടിമാങ്ങ എന്നുവെച്ചാല്‍ അണ്ടിയുള്ള മാങ്ങ അതായത് കശുമാങ്ങ) നാലുപേരും അണ്ടി പാവാടയുടെ കീശയിലും മാങ്ങ വായിലും കടത്തുമ്പോഴാണ് മരത്തിന്റെ മുകളില്‍ നിന്നും ഒരു പെണ്ണിന്റെ അലര്‍ച്ച കേള്‍ക്കുന്നത്, “ആരെടാ അണ്ടി കക്കുന്നത്. ഞാനങ്ങോട്ട് വന്നാല്‍ നിന്നെയൊക്കെ….” പിന്നെ പുളിച്ച് നാറിയ തെറിയാണ് . പെട്ടെന്ന് ഞെട്ടി എട്ട് കണ്ണുകളും മേലോട്ട് നോക്കി. അപ്പോള്‍ മരത്തിന്റെ ഉയര്‍ന്ന കൊമ്പില്‍ നിന്ന് കശുമാങ്ങ പറിച്ച് താഴെയിടുന്നത്; ഒരു പാവാടക്കാരി, ഞങ്ങളെ സ്ക്കൂളിലെ ഏഴാംതരത്തില്‍ പഠിക്കുന്ന പ്രേമ.

പ്രേമ:- അവള്‍ എണ്ണക്കറുപ്പ് നിറമുള്ള ഒരു മരം കയറി പെണ്ണായിരുന്നു. മരം‌കയറ്റം പ്രേമയുടെ ഒരു വിനോദമാണ്. (അത്യാവശ്യം വരുമ്പോള്‍ അവള്‍ തേങ്ങയും കയറി പറിക്കാറുണ്ട്) പഠിപ്പില്‍ പിന്നിലാണെങ്കിലും ഓട്ടം, ചാട്ടം, വീട്ടുജോലികള്‍, മറ്റ് കുട്ടികളുമായുള്ള അടിപിടി; തുടങ്ങി എല്ലാറ്റിലും അവള്‍ ഒന്നാം സ്ഥാനത്താണ്. അവളുടെ അമ്മ അച്ഛനെ ഭരിക്കും; എന്നാല്‍ മൂന്നു മക്കളില്‍ മൂത്തവളായ പ്രേമ അച്ഛനെയും അമ്മയെയും ഭരിക്കും. മരത്തിനു മുകളില്‍ പ്രേമയെ കണ്ടതിനു ശേഷമാണ്, താഴെ വീണത് എടുക്കുന്നതിന് മുന്‍പ് നാലുവശത്തും പിന്നെ മുകളിലോട്ടും നിരീക്ഷിക്കുന്ന സ്വഭാവം എനിക്കും എന്റെ നാട്ടുകാര്‍ക്കും ഉണ്ടായത്.

നമ്മുടെ കഥാനായിക ഒന്‍പതാം ക്ലാസ്സില്‍ തോറ്റപ്പോള്‍ പഠനം പാതിവഴിക്ക് നിര്‍ത്തി. എന്നാല്‍ ജീവിതത്തില്‍ തോല്‍ക്കാത്ത അവള്‍ തയ്യല്‍ പഠിച്ചു. പുതിയതായി ആരംഭിച്ച, ഏതാനും സ്ത്രീകളാല്‍ നടത്തപ്പെടുന്ന തയ്യല്‍‌ക്കടയില്‍ ജീവിതത്തില്‍ ആവശ്യമുള്ളതെല്ലാം തുന്നിയുണ്ടാക്കാന്‍ അവള്‍ പഠിച്ചു. പ്രേമയുടെ തയ്യല്‍‌കടയുടെ മുന്നില്‍ റോഡിന്റെ മറുവശത്തായി ഒരു ടൈപ്പ്‌റൈറ്റിങ്ങ് ഇന്‍സ്റ്റിട്യൂട്ട് സ്ഥിതിചെയ്യുന്നുണ്ട്. തുന്നലിന്റെ ശബ്ദത്തോടൊപ്പം ടൈപ്പ് ചെയ്യുന്ന ശബ്ദവും ഇടകലര്‍ന്ന് കേള്‍ക്കാം. (ഇപ്പോള്‍ തൊഴിലില്ലാത്ത പെണ്‍‌പട ടൈപ്പ്‌റൈറ്ററിന് പകരം കമ്പ്യൂട്ടര്‍ പഠിക്കുന്നു) ടൈപ്പ് പഠിക്കാന്‍ വരുന്ന തരുണീമണികള്‍ അവരുടെ പാവാട, ബ്ലൌസ്, പിന്നെ പറയാന്‍ മടിക്കുന്ന ഐറ്റംസ്, എല്ലാം തുന്നാന്‍ കൊടുക്കുന്നത് പ്രേമയുടെ കടയിലാണ്.

ലത:- SSLC കഴിഞ്ഞ ശേഷം പുതിയതായി ടൈപ്പ്‌റൈറ്റിങ്ങ് പഠിക്കാന്‍ തുടങ്ങിയവള്‍. അന്ന് ഒരു മഞ്ഞ സാരിക്ക് മാച്ച്‌ചെയ്യുന്ന മഞ്ഞ ബ്ലൌസ് തുന്നാന്‍ വേണ്ടിയാണ് പ്രേമയുടെ തയ്യല്‍ക്കടയില്‍ വന്നത്. ആദ്യമായി സാരി ഉടുക്കുന്നത് കൊണ്ട് ബ്ലൌസിന്റെ അളവ് പ്രേമ എടുക്കാന്‍ തുടങ്ങി. അപ്പോഴാണ്; ഇരുവര്‍‌ക്കും രോമാഞ്ചം ഉണ്ടായതും അടുപ്പം വര്‍ദ്ധിച്ചതും.
.
പിറ്റേ ദിവസം മുതല്‍ ലതയും പ്രേമയും ഒന്നിച്ച് നടക്കാന്‍ തുടങ്ങി. പ്രേമ രാവിലെ ജോലിക്ക് വരുന്നുണ്ടെങ്കിലും ഉച്ചയ്ക്കു ശേഷമാണ് ടൈപ്പ് പഠിക്കാന്‍ ലത വരുന്നത്. വൈകുന്നേരം ഒന്നിച്ച് പോകുന്ന അവര്‍ വേര്‍പിരിയാന്‍ കഴിയാത്ത കൂട്ടുകാരികളായി മാറി. പ്രേമ ആദ്യം ലതയെ അവളുടെ വീട്ടില്‍ വിട്ടതിനു ശേഷമാണ് എന്നും സ്വന്തം വീട്ടിലേക്ക് പോകുന്നത്. ഇതിനിടയില്‍ അവര്‍ വീട്ടുകാര്യങ്ങളും നാട്ടുകാര്യങ്ങളും അന്താരാഷ്ട്രകാര്യങ്ങളും ചര്‍ച്ച ചെയ്യും. ലതയ്ക്ക് കല്ല്യാണം കഴിഞ്ഞ രണ്ട് ചേച്ചിമാരും കല്ല്യാണം കഴിയാത്ത ഭീകരന്മാരായ മൂന്ന് ആങ്ങളമാരും പാവങ്ങളായ ഒരച്ഛനും ഒരമ്മയും ഉണ്ട്. പ്രേമക്ക് സ്വന്തമായി അച്ഛനും അമ്മയും പിന്നെ ബന്ധുക്കളായി എല്ലാവരും ഉണ്ടെങ്കിലും അവള്‍ ആരുടെയും നിയന്ത്രണത്തിലല്ല.

മാസങ്ങള്‍ കഴിഞ്ഞതോടെ വീണുകിട്ടുന്ന ഞായറാഴ്ചകളില്‍ പ്രേമ-ലതകള്‍ സിനിമ കാണാനും ടൌണില്‍ കറങ്ങിനടക്കാനും തുടങ്ങി. നാട്ടുകാരായ ചിലര്‍ക്ക് രണ്ട് പെണ്‍‌കുട്ടികള്‍ തമ്മിലുള്ള അസാധാരണമായ ബന്ധം ചര്‍ച്ചാവിഷയമായി മാറിയെങ്കിലും; അത് കേട്ടവര്‍, അസൂയ കൊണ്ടാണെന്ന് പറഞ്ഞ് അവരെ പരിഹസിച്ചു. ആങ്ങളമാര്‍ ലതയോട് പ്രേമയുമായുള്ള ബന്ധത്തെപ്പറ്റി ചോദിച്ചപ്പോള്‍, അവള്‍ അതില്‍ തെറ്റില്ലെന്ന് വാദിച്ചു.
“ഞാനെന്താ ആണ്‍കുട്ടിയുടെ കൂടെയാണോ നടക്കുന്നത്? എന്റെ ചേച്ചിയുടെ കൂടെയല്ലെ; അതിലെന്താണ് തെറ്റ്?”
ഇതു കേട്ട് വീട്ടുകാര്‍ ആശ്വസിച്ചു. പ്രേമയുടെ വീട്ടിലാണെങ്കില്‍ അവളെ ചോദ്യം ചെയ്യാന്‍ ധൈര്യമുള്ള ആരും ആ വീട്ടില്‍ ഇതുവരെ ജനിക്കുകയോ വളരുകയോ ചെയ്തിട്ടില്ല.

ഒരു ഞായറാഴ്ച അടുത്ത പ്രദേശത്തെ ഒരു ചെറുപ്പക്കാരന്‍ ലതയെ പെണ്ണ്കാണാന്‍ വന്നു. വന്നവര്‍‌ക്ക് ഇഷ്ടമായി. അതുപോലെ ലതയ്ക്കും ചെക്കനെ ഇഷ്ടമായി. പിറ്റേദിവസം വളരെ സന്തോഷത്തോടെ ലത ഇക്കാര്യം പ്രേമയോട് പറഞ്ഞു. എന്നാല്‍ ഇത് കേട്ടയുടനെ പ്രേമയുടെ ഭാവം മാറി.
“കല്ല്യാണം കഴിക്കാനോ? അതൊന്നും പാടില്ല. ആണുങ്ങളെ എങ്ങിനെ വിശ്വസിക്കും?”
പിന്നെ ഒരു മണിക്കൂര്‍ ‘കല്ല്യാണശേഷം നടക്കുന്ന ജീവിതപ്രശ്നങ്ങളെകുറിച്ച് പ്രേമ ക്ലാസ്സ് കൊടുത്തു. ഒടുവില്‍ പ്രേമ ഇടപെട്ട് ലതയുടെ വിവാഹം ഒഴിവാക്കി . അതിനുശേഷം ലതയുടെ വീട്ടുകാര്‍ പ്രേമയോടൊപ്പം നടക്കുന്നതിനെ എതിര്‍ത്തു. ടൈപ്പ്‌റൈറ്റിങ്ങ് ക്ലാസ്സ് ഒഴിവാക്കി.

അങ്ങനെയിരിക്കെ ഒരു ദിവസം നാട് ഉണര്‍ന്നത് ആ വാര്‍ത്തയുമായാണ് ‘പ്രേമ ലതകളെ കാണാനില്ല’. ലതയുടെ സഹോദരങ്ങള്‍ അവളെ അന്വേഷിച്ച് പോലീസിലും പത്രത്തിലും വാര്‍ത്ത നല്‍കി. ഒടുവില്‍ ഒരാഴ്ച കഴിഞ്ഞപ്പോള്‍ കോഴിക്കോട് അങ്ങാടിയിലൂടെ ചുറ്റിക്കറങ്ങുന്ന രണ്ട് പെണ്‍‌കുട്ടികളെയും പോലീസ് പിടിച്ച് രക്ഷിതാക്കളെ ഏല്‍പ്പിച്ചു. അപ്പോഴേക്കും കൈയിലുള്ള പണവും ആഭരണങ്ങള്‍ വിറ്റ്‌കിട്ടിയ പണവും തീര്‍ന്നിരുന്നു. അങ്ങനെ ആഘോഷപൂര്‍‌വ്വം വീട്ടില്‍ തിരിച്ചെത്തിയ ലത, പ്രേമയുടെ കൂടെ പോകണമെന്ന് വാശിപിടിക്കുകയും ഒന്നിച്ച് ജീവിക്കാന്‍ അനുവദിച്ചില്ലെങ്കില്‍ ആത്മഹത്യ ചെയ്യുമെന്ന് ഭീഷണിപ്പെടുത്തുകയും ചെയ്തു. അതോടെ വീട്ടുകാര്‍ അവളെ മുറിയില്‍ അടച്ചിട്ടു. എന്നാല്‍ പ്രേമ പിറ്റേ ദിവസം മുതല്‍ ഒരു ഭാവമാറ്റവും കൂടാതെ തുന്നല്‍‌ക്കടയില്‍ പോകാന്‍ തുടങ്ങി.

ഒരാഴ്ച പ്രധാനവാര്‍ത്തകളൊന്നും ഉണ്ടായില്ല. സൂര്യന്‍ കിഴക്ക് ഉദിക്കുന്നത് കാണാത്തവര്‍ കൂടി പടിഞ്ഞാറ് അറബിക്കടലില്‍ അസ്തമിക്കുന്നത് വ്യക്തമായി കണ്ടു. എന്നാല്‍ ഒരു ശനിയാഴ്ച ദിവസം പുലര്‍ന്നത്, ആ വാര്‍ത്തയുമായാണ്
… ലത അത്മഹത്യ ചെയ്തിരിക്കുന്നു. സ്വന്തം മുറിയിലെ കഴുക്കോലില്‍ കുരുക്കിട്ട മഞ്ഞസാരിയില്‍ അവള്‍ തൂങ്ങിക്കിടക്കുന്നു. മരിക്കുന്നതിനു മുന്‍പ് സ്വന്തം വിരല്‍ മുറിച്ച് ഒഴുകുന്ന രക്തംകൊണ്ട് കണ്ണാടിയില്‍ എഴുതിയിരിക്കുന്നു;
‘പ്രേമലതകള്‍’


പിന്‍‌കുറിപ്പ്:
  1. പ്രേമ പതിവുപോലെ തയ്യല്‍‌ക്കടയില്‍ പോകാന്‍ തുടങ്ങി. അവള്‍ പുതിയതായി വരുന്ന പെണ്‍കുട്ടികളുടെ അളവുകള്‍ എടുത്ത് വീണ്ടും ബ്ലൌസുകള്‍ തുന്നിയുണ്ടാക്കാന്‍ തുടങ്ങി.
  2. കഥയില്‍ ചോദ്യങ്ങള്‍ ഉണ്ട്; ഉത്തരം കിട്ടാ‍ത്ത ചോദ്യങ്ങള്‍ മാത്രം.

12.8.09

19. അദ്ധ്യാപകന്‍ ‘ഗ്രൌണ്ടില്‍‘ ഡ്യൂട്ടിയിലാണ്.



ഒരു വിദ്യാലയം അവിടത്തെ ഹെഡ്‌മാസ്റ്ററെ ആശ്രയിച്ചിരിക്കും; ആ വിദ്യാലയത്തിലെ ഒരു ക്ലാസ്സ്, അതിലെ ക്ലാസ്സ് ടീച്ചറെ ആശ്രയിച്ചിരിക്കും. അതുപോലെ ക്ലാസ്സിന് പുറത്തുള്ള വിദ്യാര്‍ത്ഥികള്‍ അവിടത്തെ കായികാദ്ധ്യാപകനെ ആശ്രയിച്ചിരിക്കും. നല്ല (ഭീകരനായ) ഒരു ഫിസിക്കല്‍ എഡ്യൂക്കേഷന്‍ ടീച്ചര്‍ (PET) സ്ക്കൂളിലുണ്ടെങ്കില്‍ എച്ച്. എം.ന്റെ ജോലി പകുതിയായി കുറയും. ഏത് വില്ലനായ കുട്ടിയെയും അറ്റന്‍‌ഷന്‍ പറഞ്ഞ് നിര്‍ത്താനുള്ള കഴിവ് കായികഅദ്ധ്യാപകന് ഉണ്ട്. മതില്‍ ചാടുന്നവനെയും വേലി ചാടുന്നവനെയും കണ്ടുപിടിക്കുന്നത് അവരായിരിക്കും. ഇക്കാര്യത്തില്‍ പുരുഷ- വനിത പി.ഇ.ടി. മാര്‍ ഒരു പോലെ കഴിവുള്ളവരാണ്. നിയമപ്രകാരം തെറ്റാണെങ്കിലും ആവശ്യമുള്ളപ്പോള്‍ ‘മര്‍മ്മം ഒഴിവാക്കി ഒന്ന് പൊട്ടിച്ചു കൊടുക്കാന്‍’ അവരെപോലെ മറ്റാര്‍ക്കും കഴിവില്ല.

ഞങ്ങളുടെ വിദ്യാലയത്തില്‍ എല്ലാകഴിവുകളും തികഞ്ഞ ഒരു കായിക അദ്ധ്യാപകന്‍ ഉണ്ട്. ആ വര്‍ഷം പെന്‍ഷന്‍ പറ്റി പിരിഞ്ഞു പോകേണ്ട ആളാണെങ്കിലും കുട്ടികളുടെ കൂടെയെത്തിയാല്‍ ചെറുപ്പക്കാരുടെ ആവേശമാണ്. സമരക്കാരുടെ മുന്നിലും പിന്നിലും അദ്ദേഹം ഉണ്ടാവും. അസുഖമുള്ള കുട്ടിയെ വീട്ടിലെത്തിക്കാനും ഉച്ചക്കഞ്ഞി പാചകസ്ഥലത്തും ശബ്ദം ഉയരുന്ന ക്ലാസ്സുകളിലും പെട്ടെന്ന് കായികഅദ്ധ്യാപകന്‍ എത്തിച്ചേരും.
‘ഇവിടെ പറഞ്ഞവയെല്ലാം അദ്ദേഹം സ്ക്കൂളില്‍ ഉണ്ടെങ്കില്‍ തീര്‍ച്ചയായും ചെയ്യുന്ന കാര്യങ്ങളാണ്‘. എന്നാല്‍ ഈ കായികത്തെ കണ്ടുകിട്ടുന്നത് അപൂര്‍‌വ്വമാണ്. സ്ക്കൂളിന് സ്വന്തമായി ഗ്രൌണ്ടില്ലെങ്കിലും അതിരാവിലെ മുതല്‍ അദ്ദേഹം ഏതെങ്കിലും ഗ്രൌണ്ടില്‍ ആയിരിക്കും. വിദ്യാര്‍ത്ഥികള്‍ അദ്ധ്യാപകനെ അന്വേഷിച്ച് കണ്ടെത്തി സ്വന്തമല്ലാത്ത ഗ്രൌണ്ടില്‍ പോയി പ്രാക്റ്റീസ് ചെയ്യും. മഴക്കാലത്ത് നീന്തല്‍, വേനല്‍‌ക്കാലത്ത് നീന്തല്‍ ഒഴികെയുള്ള ഐറ്റം‌സ്.

ഞങ്ങളുടെ സ്ക്കൂളിലെ sslc വിജയശതമാനം കഴിഞ്ഞ വര്‍ഷം വളരെ പിന്നിലാണെന്ന് കണ്ടെത്തിയതോടെ അത്, എല്ലാവരും ഒത്തുപിടിച്ച് ഉയര്‍ത്തുന്ന കാലഘട്ടം. ജില്ലാകേന്ദ്രങ്ങളില്‍ നിന്ന് അദ്ധ്യാപകര്‍ക്ക് പ്രത്യേക പരിശീലനങ്ങള്‍ നല്‍കുകയും ഇടയ്ക്കിടെ പരിശോധനകള്‍ ഉണ്ടാവുകയും ചെയ്യും. എന്നാല്‍ പരീക്ഷകളിലും റിസല്‍‌ട്ടിലും ഒരു താല്പര്യവും കാണിക്കാതെ നമ്മുടെ കായികം പതിവ് ശൈലികള്‍‌ തന്നെ തുടര്‍ന്നതില്‍ എല്ലാവര്‍ക്കും അസൂയയും അമര്‍ഷവും ഉണ്ട്. പുതിയ ഹെഡ്‌മാസ്റ്റര്‍ വന്നപ്പോഴെങ്കിലും ഡ്രില്ല്‌മാഷ് സ്ക്കൂളില്‍ ഒതുങ്ങിക്കൂടും എന്ന് എല്ലാവരും പ്രതീക്ഷിച്ചു.

നമ്മുടെ കായികാദ്ധ്യാപകന്‍ സ്ക്കൂളില്‍ വരാതിരിക്കുന്നത് എല്ലാ രേഖകളോടും കൂടിയായിരിക്കും. ജില്ലയിലും, ജില്ലയ്ക്ക് പുറത്തും നടക്കുന്ന എല്ലാ കായിക മാമാങ്കങ്ങള്‍ക്കും ‘നമ്മുടെ സ്ക്കൂളിലെ’ അദ്ധ്യാപകന്റെ സാന്നിദ്ധ്യം ഉണ്ടായിരിക്കും. അദ്ദേഹത്തെ ഗ്രൌണ്ടിലേക്ക് വിട്ടുകൊടുക്കാനുള്ള അറിയിപ്പുകള്‍ ഹെഡ്‌മാസ്റ്റര്‍ക്ക് ഇടയ്ക്കിടെ കിട്ടികൊണ്ടിരിക്കും. ഒരൊ വര്‍ഷവും 200 പ്രവൃത്തി ദിവസങ്ങളാണുള്ളത്; എന്നാല്‍ നമ്മുടെ ഡ്രില്ല്‌മാഷിന് ഇതൊന്നും പ്രശ്നമല്ല. പക്ഷെ മാസത്തില്‍ ഒരു ദിവസം, ശമ്പളബില്ല് കാഷ്‌ ചെയ്യുന്ന ആ ദിവസം, അദ്ദേഹം കൃത്യമായി കണ്ടുപിടിച്ച് സ്ക്കൂളിലെത്തും.

ഒരു ദിവസം സ്ക്കൂളിന്റെ പഠന നിലവാരം പരിശോധിക്കാനായി ജില്ലാതലത്തിലെ ഓഫീസര്‍ സ്ക്കൂളില്‍ വന്നു. കായികാദ്ധ്യാപകന്റെ അസാന്നിധ്യം കൊണ്ടുള്ള പ്രശ്നം ഹെഡ്‌മാസ്റ്റര്‍ അദ്ദേഹത്തെ അറിയിച്ചു. അതിന് പ്രതിവിധി ഓഫീസര്‍‌ തന്നെ പറഞ്ഞു കൊടുത്തു; ‘ഇനി സ്ക്കൂളിന് വെളിയില്‍ സ്പോഡ്‌സ്, ഗെയിം‌സ് എന്നിവ നടത്താന്‍ കായികത്തിന് രേഖാമൂലം അനുവാദം കൊടുക്കേണ്ട. കൂടാതെ ജില്ലാ വിദ്യാഭ്യാസ ഓഫീസില്‍ നിന്ന് ഇനിമുതല്‍ ഈ വിദ്യാലയത്തിലെ ഡ്രില്ല്‌മാഷിന്റെ സേവനം ആവശ്യപ്പെട്ട് ഒരിക്കലും കടലാസ് അയക്കുകയില്ല’. ഇതെല്ലാം കേട്ട ഹെഡ്‌മാസ്റ്റര്‍ വളരെ സന്തോഷിച്ചു. ഇനിമുതല്‍ കായിക അദ്ധ്യാപകനെ വരച്ച വരയില്‍ നിര്‍ത്തി ‘ലെഫ്റ്റ്, റൈറ്റ്’ എന്ന് പറയിക്കാമല്ലോ.

പിറ്റേ ദിവസം മുതല്‍ നമ്മുടെ കായികം അണ്ടിപോയ അണ്ണാനെപോലെ ക്ലാസ്സുകള്‍‌തോറും നടന്നു. ഗൌണ്ടില്ലാത്ത സ്ക്കൂളില്‍ അദ്ദേഹം എന്ത് ചെയ്യാനാണ്? അങ്ങനെ നാല് ദിവസം കഴിഞ്ഞു; കുട്ടികള്‍‌ക്കെല്ലാം തികഞ്ഞ അച്ചടക്കം. അഞ്ചാം ദിവസം പിറന്നു. അന്ന് ഉച്ചയ്ക്ക് ശേഷം ഹെഡ്‌മാസ്റ്റര്‍ക്ക് ഒരു പ്രത്യേക അറിയിപ്പ് പോസ്റ്റലായി വന്നു. അറിയിപ്പ് ഇതാണ് ‘ജില്ലാ പോലീസ് അസോസിയേഷന്റെ കായികമേളയുടെ സുഗമമായ നടത്തിപ്പിന് 10 ദിവസം നിങ്ങളുടെ സ്ക്കൂളിലെ ‘ഫിസിക്കല്‍ എഡ്യുക്കേഷന്‍ ടീച്ചറുടെ’ സേവനം വിട്ടുതരണം’. ആ അറിയിപ്പ് വന്നത് പോലീസ്‌സ്റ്റേഷനില്‍ നിന്ന് തന്നെ. ഹെഡ്‌മാസ്റ്റര്‍ ആ കടലാസ് വായിച്ച് തിരിച്ചും മറിച്ചും നോക്കുമ്പോഴേക്കും നമ്മുടെ കായികാദ്ധ്യാപകന്‍ മുന്നിലെത്തിയിരുന്നു.
.
കായികം പതുക്കെ ചോദിച്ചു, “സര്‍ നമ്മള്‍ ടീച്ചേര്‍‌സ് പോലീസുകാരെ പിണക്കണോ? സാറ് വിളിക്കുമ്പോള്‍ പെട്ടെന്ന് ഓടിയെത്തുന്നവരാണ്”

4.8.09

18. കലിയുഗ ചിന്തകള്‍


യുഗങ്ങള്‍ നാലാണ്. ഇപ്പോള്‍ നാം സഞ്ചരിച്ച് കൊണ്ടിരിക്കുന്നത് കലിയുഗത്തില്‍ കൂടിയാണ്. കലിയുഗത്തിന്റെ അവസാന കാലത്തെ ലക്ഷണങ്ങള്‍ മഹാഭാരതത്തില്‍ പറയുന്നുണ്ട്.
.
‘മനുഷ്യരുടെ ചിന്തയും പ്രവൃത്തിയും പരസ്പരവിരുദ്ധമായി മാറുന്നു. ആളുകള്‍ക്ക് ഭക്ഷ്യവും അഭക്ഷ്യവും തിരിച്ചറിയാതാവുന്നു. ഭൂമി മ്ലേച്ഛന്മാര്‍ ഭരിക്കുന്നു. സ്ത്രീകള്‍ പൊക്കം കുറഞ്ഞവരും ധാരാളം പ്രസവിക്കുന്നവരും ആയി മാറുന്നു. ഗുരുനാഥന്മാര്‍ വിദ്യ വില്‍ക്കുന്നു. സ്ത്രീകള്‍ ശരീരം വില്‍ക്കുന്ന വേശ്യകളായി മാറുന്നു. ഗൃഹസ്ഥന്മാര്‍ ചോറ് വില്‍ക്കുന്നു. പുരുഷന്മാര്‍ക്ക് സ്വന്തം മകളിലും സ്ത്രീകള്‍ക്ക് ഭൃത്യന്മാരിലും മക്കള്‍ ഉണ്ടാവുന്നു. ഭിക്ഷാടനമെന്ന പേരില്‍ വീട്ടില്‍ കയറി മോഷണം നടത്തുന്നു. കള്ളവും തട്ടിപ്പും മദ്യപാനവും നാട്ടില്‍ വര്‍ദ്ധിക്കുന്നു.സസ്യങ്ങളില്‍ നിന്നും ജന്തുക്കളില്‍ നിന്നും ആദായം കുറയുന്നു. മരങ്ങളില്‍ മറ്റു പക്ഷികള്‍ കുറഞ്ഞ് കാക്കകള്‍ വര്‍ദ്ധിക്കുന്നു... അങ്ങനെ ഒടുവില്‍ ഏഴ് സൂര്യന്‍മാര്‍ ചേര്‍ന്നുള്ള പ്രളയാഗ്നിയില്‍ പ്രപഞ്ചം നശിക്കുന്നു’.



അന്ന് കലിയുഗ ലക്ഷണമായി പറഞ്ഞതെല്ലാം ഇന്ന് ആചാരമായി മാറിയിരിക്കയാണ്. ‘ചിന്തയും പ്രവൃത്തിയും തമ്മിലുള്ള ബന്ധം ഇല്ലാതായിട്ട് വളരെ നാളായി. കഴിക്കുന്നത് എന്താണെന്നറിയാതെയാണ് പലതും നാം ഭക്ഷിക്കുന്നത്. ഭൂമി ഭരിക്കുന്നത് ഇപ്പോള്‍ തട്ടിപ്പ്‌വീരന്മാരാണ്. പിന്നെ സ്ത്രീകള്‍ ധാരാളം പ്രസവിക്കും; കുടും‌ബാസൂത്രണം കാരണം ചാന്‍സ് കിട്ടാത്തതു കൊണ്ടാണ്. ഗുരുനാഥന്മാര്‍ ശമ്പളം കണക്ക്‍പറഞ്ഞ് വാങ്ങുകയും നിരക്ക് കൂട്ടാന്‍ സമരം നടത്തുകയും ചെയ്യുന്നു. സ്ത്രീകള്‍‌ക്ക് എളുപ്പത്തില്‍ വില്‍ക്കാന്‍ പറ്റുന്നത് ശരീരമാണല്ലോ; എന്നാല്‍ ഇപ്പോള്‍ ആണ്‍‌വേശ്യകളും പെരുകുന്നു. ഗൃഹസ്ഥന്മാര്‍ ഫൈവ് സ്റ്റാര്‍ ഹോട്ടല്‍ നടത്തി ചോറ് വില്‍ക്കുന്നു. മക്കളെ ഉണ്ടാക്കുന്ന കാര്യമാണെങ്കില്‍; – ‘എന്റെ കൊച്ചിന്റെ അച്ഛന്‍, എന്റെ അച്ഛനാണ്‘, എന്ന് പറയേണ്ട അവസ്ഥയിലുള്ള കൊച്ചു പെണ്‍‌കുട്ടികള്‍ നമ്മുടെ കൊച്ചുകേരളത്തില്‍ തന്നെ കാണും- സ്ത്രീകള്‍ ഭര്‍ത്താവിനെയും മക്കളെയും മറന്ന് മറ്റ് പുരുഷന്മാരുടെ പിന്നാലെ പായുന്നു. വീട്ടില്‍ വരുന്ന അപരിചിതരെല്ലാം തട്ടിപ്പുകാരും കള്ളന്മാരും ആണെന്ന സംശയത്തിന് ഇടയാക്കുന്ന സാഹചര്യം വര്‍ദ്ധിക്കുന്നു. അച്ഛന്റെ തൊഴില്‍ എന്താണെന്ന് ചോദിച്ചാല്‍ ‘മദ്യപാനം’ എന്ന് മക്കള്‍ തന്നെ പറയുന്നു. രാസവളവും കീടനാശിനിയും ചേര്‍ന്ന് കൃഷി നശിപ്പിക്കുന്നു. കാക്കകളെ പേടിച്ച് ഇപ്പോള്‍ തണല്‍‌മരങ്ങളുടെ ചുവട്ടില്‍‌പോലും ആരും നില്‍ക്കാറില്ല’ : … ഞാന്‍ ചോദിക്കുകയാണ്: എന്നിട്ടും എന്തേ പ്രളയാഗ്നി ഇത്രയും വൈകുന്നത്?



നമ്മുടെ പുരാണങ്ങളിലും ഇതിഹാസങ്ങളിലും കാണാന്‍ കഴിയാത്ത പലതുമാണ് ഇന്ന് നമ്മുടെ നാട്ടില്‍ സംഭവിക്കുന്നത് എന്ന് അറിയാന്‍ കഴിയും. പുതിയ കലിയുഗലക്ഷണങ്ങള്‍ അവതരിക്കുകയാണ്. അതിലൊന്നാണ് സ്വവര്‍ഗ്ഗ വിവാഹം. കല്ല്യാണം കഴിക്കാന്‍ ഇനി ‘ആണിന് പെണ്ണും, ‘പെണ്ണിന് ആണും, തന്നെ വേണമെന്നില്ല. ഇനി മനുഷ്യനു പകരം മറ്റ് ഏതെങ്കിലും ജീവിയായാലും മതി എന്ന് നിയമം വരുമോ!!! ഒരു മനുഷ്യനോട് അയാളുടെ ഭര്‍ത്താവ് or ഭാര്യ ‘ആണോ, പെണ്ണോ‘ എന്ന് മാത്രമല്ല; ഏത് ജീവിയാണെന്ന് കൂടി ചോദിക്കേണ്ട കാലം തന്നെ വരാം. സ്വവര്‍ഗ്ഗവിവാഹം നിയമാനുസൃതമാക്കിയതിനാല്‍ ഇനിയങ്ങോട്ട് പുതിയ രൂപത്തിലുള്ള ബയോഡാറ്റകള്‍ കൊച്ചു കേരളത്തിലും പ്രത്യക്ഷപ്പെടാം.
പേര്‍ : അസന്തുഷ്ടന്‍
പുരുഷനോ സ്ത്രീയോ : സ്ത്രീ
കല്ല്യാണം കഴിച്ചതാണോ : അതെ
പങ്കാളിയുടെ പേര്‍ : അവിഹിത
പുരുഷനോ സ്ത്രീയോ : സ്ത്രീ
കുട്ടികളുടെ എണ്ണം : രണ്ട്
ബാക്കി ഭാവനയില്‍ പലതും ചേര്‍ക്കാം.



അപ്പോള്‍ ഇനിയങ്ങോട്ട് മകന് കല്ല്യാണം കഴിക്കാന്‍ പറ്റിയ പെണ്ണിനെ മാത്രമല്ല ആണിനെയും അന്വേഷിക്കാം. അതുപോലെ മകളെ കനത്ത സ്ത്രീധനം കൊടുത്ത് കല്ല്യാണം കഴിച്ചയക്കുന്നതിനു പകരം ഒരു പെണ്ണിനെതന്നെയായാല്‍ പ്രശ്നം പരിഹരിക്കപ്പെട്ടല്ലൊ. പിന്നെ ജനപ്പെരുപ്പം തടയാന്‍ എളുപ്പവഴിയാണ് ഇത്തരം വിവാഹങ്ങള്‍. കുട്ടികളുടെ ജനനവും വിവാഹവും തമ്മില്‍ ഒരു ബന്ധവും ഇല്ലാതാവുന്ന അവസ്ഥയില്‍ ജനനം സ്പോണ്‍സര്‍ ചെയ്യാന്‍ സ്ക്കൂളുകള്‍ തമ്മില്‍ മത്സരമാവും. കലിയുഗമല്ലെ; കാലം മാറുകയല്ലെ; ആ മാറ്റത്തിനൊത്ത് നമ്മളും മുന്നേറണ്ടതല്ലെ.



ഒരു ഫ്ലാഷ് ബാക്ക് :
പുതിയതായി ഹൈസ്ക്കൂളില്‍ ജോലി ലഭിച്ച് ഏതാനും മാസം കഴിഞ്ഞു. ഒന്‍പതാം ക്ലാസ്സില്‍ മനുഷ്യശരീരം പഠിപ്പിച്ച് മുന്നേറുകയാണ്. അപ്പോഴാണ് അത് കണ്ടത്. പിന്‍‌ബഞ്ചിലിരിക്കുന്ന ഒരു ആണ്‍‌കുട്ടി നോട്ട്‌ബുക്കില്‍ നിന്നും പറിച്ചടുത്ത നാലായി മടക്കിയ കടലാസ് തൊട്ടപ്പുറമുള്ള ഒരുത്തന് കൊടുക്കുന്നു. അത് കിട്ടിയവന്‍ ഉടനെ ബയോളജി ടെക്‍സ്റ്റ് ബുക്കില്‍ ഒളിപ്പിക്കുന്നു. പഠനത്തില്‍ ശ്രദ്ധിക്കാതെ ഒളിപ്പിച്ചത്, പിടിച്ചെടുക്കേണ്ടത് എന്റെ ഡ്യൂട്ടിയില്‍ ഉള്‍പ്പെട്ടതാണല്ലൊ. ഞാനൊന്നുമറിഞ്ഞില്ല എന്ന മട്ടില്‍ ഞാന്‍ നടന്ന് പിന്നിലെത്തി ടെക്‍സ്റ്റ് ബുക്ക് തുറന്ന് തൊണ്ടിസാധനം എടുത്തു. ഉടനെ, ആ കടലാസ് തിരിച്ച്‌കിട്ടാന്‍, കൊടുത്തവനും കിട്ടിയവനും പരിശ്രമിച്ചു. ക്ലാസ്സ് കഴിഞ്ഞതിനു ശേഷവും അവര്‍ എന്റെ പിന്നാലെ വന്ന് ആ കടലാസിനുവേണ്ടി അപേക്ഷിക്കുമ്പോള്‍ ഗുരുതരമായ എന്തോ പ്രശ്നം അതിലുണ്ടെന്ന് ഞാന്‍ മനസ്സിലാക്കിയതിനാല്‍ തിരിച്ചുകൊടുത്തില്ല.


സ്റ്റാഫ് റൂമില്‍ എത്തി സീറ്റിലിരുന്ന് സമാധാനമായി വായിച്ചു. അസ്സല്‍ പ്രേമലേഖനം തന്നെ. ഒരുവന്‍ അതേ ബഞ്ചിലിരിക്കുന്ന മറ്റൊരുവന് കൊടുത്തത്. ഒരാണ്‍‌കുട്ടിക്ക് മറ്റൊരു ആണ്‍കുട്ടിയോട് തീവ്രമായ പ്രേമം. ദിവസേന കണ്ടില്ലെങ്കില്‍ ആത്മഹത്യ ചെയ്യും എന്ന് വരെ എഴുതിയിരിക്കുന്നു. പിന്നെ എഴുതാനും പറയാനും വായിക്കാനും പറ്റാത്ത പലതും. പുതുമയുള്ള ഈ വസ്തു ബാബുമാസ്റ്ററെ ഏല്‍‌പ്പിച്ചു. വിദ്യാര്‍ത്ഥികള്‍ പേടിക്കുന്ന ഭീകരനായ കണക്ക്‍മാഷാണ് അദ്ദേഹം. ബാബുമാസ്റ്റര്‍ വിശുദ്ധ പ്രേമലേഖനം വായിച്ച് എന്നോട് പറഞ്ഞു;

“ടീച്ചറെ ഇതൊക്കെ അവര്‍ക്ക് ശരിയായിരിക്കും, നമ്മള്‍ ഈ കത്തിന്റെ പേരില്‍ ചോദ്യം‌ ചെയ്യാത്തതാണ് നല്ലത്. ഇത് ഒരു പെണ്‍‌കുട്ടിക്കാണ് കൊടുത്തതെങ്കില്‍ അത് തെറ്റാണെന്ന് നമുക്ക് പറയാം. അവനെ ഭീഷണിപ്പെടുത്തി ചോദ്യം ചെയ്യാം”


അതെ അതു തന്നെയാണ് ശരി. തെറ്റും ശരിയും വേര്‍‌തിരിക്കാന്‍ ആര്‍ക്ക് കഴിയും?
ആശാന്‍ പറഞ്ഞത് പോലെ…
“ഇന്നലെ ചെയ്തോരബദ്ധം
ഇന്നത്തോര്‍‌ക്കാചാരമാവാം
നാളത്തെ ശാസ്ത്രം അതാവാം
അതില്‍ ...”
ഇപ്പോള്‍ ഇത്രയും പറഞ്ഞ് ഞാന്‍ നിര്‍ത്തുന്നു...