നിങ്ങള്‍ പറഞ്ഞത് പോലെ ചെയ്താല്‍???
കേരളത്തിലെ വിദ്യാഭ്യാസ നിലവാരം ഉയര്‍ത്തണമെന്ന് നമ്മുടെ സര്‍ക്കാറിനു പലപ്പോഴും തോന്നാറുണ്ട്. ഈ നിലവാരം ഉയര്‍ത്തുന്നത് പല തരത്തിലാണ്. ചിലപ്പോള്‍ അദ്ധ്യാപകരുടെ നിലവാരം ഉയര്‍ത്തും. മറ്റു ചിലപ്പോള്‍ വിദ്യാര്‍ത്ഥികളുടെ നിലവാരം ഉയര്‍ത്തും. എന്നാല്‍ അപൂര്‍വ്വമായി അദ്ധ്യാപകരുടെയും വിദ്യാര്‍ത്ഥികളുടെയും നിലവാരം ഉയര്‍ത്തണമെന്ന് തോന്നും. അങ്ങനെ അപൂര്‍വ്വമായ അദ്ധ്യാപക-വിദ്യാര്‍ത്ഥി നിലവാരം ഉയര്‍ത്തിക്കൊണ്ടിരിക്കുന്ന ഒരു കാലഘട്ടം.
…സര്‍ക്കാരിന്റെ സ്വന്തം ചെലവില്‍ നിര്‍മ്മിച്ച, സര്‍ക്കാര്‍ തന്നെ അദ്ധ്യാപക നിയമനം നടത്തി ശമ്പളം കൊടുക്കുന്ന,,,മാതൃഭാഷയില്‍ പഠനം നടത്തുന്ന, ഗ്രാമപ്രദേശത്തെ മാതൃകാവിദ്യാലയത്തിലെ
മാതൃക അല്ലാത്ത അദ്ധ്യാപികയാണ് ഞാന്‍
-
ഗവണ്മേന്റ് ഹൈ സ്ക്കൂള്‍ ടീച്ചര്‍-
ഓ;;;മാതൃക ആവാത്തതോ??..അതിന്റെ കാരണങ്ങള്‍ ധാരാളം ഉണ്ട്……..
- എന്റെ സ്വന്തം കുട്ടികളെ ഞാന്‍ ജോലി ചെയ്യുന്ന സ്വന്തം സ്ക്കൂളില്‍ മാതൃഭാഷയില്‍ പഠിക്കാന്‍ വിടുന്നു.
- സ്വന്തം കുട്ടികളെ പഠിപ്പിക്കാനായി പരീക്ഷാസമയത്ത് മുങ്ങിയും ലീവെടുത്തും വീട്ടിലിരിക്കാറില്ല.
- വൈകിമാത്രം സ്ക്കൂളില്‍ വരികയും നേരത്തെ പോവുകയും ചെയ്യുന്നില്ല.
- ശമ്പളവര്‍ദ്ധനവ്, ഡി.എ., ടി.എ., അലവന്‍സ്, അറിയേര്‍സ്,എച്ച്.ആര്‍.എ., തുടങ്ങിയ ചര്‍ച്ചകളില്‍ പങ്കെടുക്കാറില്ല.
- കൂടുതല്‍ സമയം വിദ്യാര്‍ത്ഥികള്‍ക്കിടയില്‍ ചെലവഴിക്കുന്നു.
- സ്റ്റാഫ് റൂമില്‍ ഇരിക്കുമ്പോള്‍ നുണപറയുന്നതിനു പകരം പഠനകാര്യങ്ങള്‍ ചര്‍ച്ച ചെയ്യുന്നു.….
- ഇനിയും എല്ലാം പറഞ്ഞാല്‍ ബ്ലോഗ് നിറയും-നിര്‍ത്തുന്നു.
അങ്ങനെ അദ്ധ്യാപകരും വിദ്യാര്‍ത്ഥികളും ഒത്തൊരുമിച്ച് നിലവാരം ഉയര്‍ത്തുന്ന ഒരു കാലം,,.ഇടയ്ക്കിടെ ടീച്ചേര്‍സിനു പരിശീലന ക്ലാസ്സുകള്‍, മുകളില്‍ നിന്നുള്ള പരിശോധനകള്‍. എല്ലാംകൊണ്ടും അന്തരീക്ഷത്തിനു ഒരു പുത്തന്‍ ഉണര്‍വ്. കുട്ടികള്‍ക്കു കൂടുതല്‍ പ്രവര്‍ത്തനങ്ങള്‍ നല്‍കി അവരുടെ ശേഷി വര്‍ദ്ധിപ്പിക്കുക. എനിക്കു കിട്ടിയത് 8 A ക്ലാസ്സിന്റെ ചാര്‍ജ്ജ്.
:—പഠിപ്പിക്കുന്ന വിഷയങ്ങള്‍…!!! ഫിസിക്സ്, കെമിസ്ട്രി, ബയോളജി ,,, ക്ലാസ്സിലെ കുട്ടികളെ എല്ലാം കൊണ്ടും ഒരു വിധം ശരിയാക്കുന്ന പ്രവര്‍ത്തനങ്ങള്‍ നടന്നുകൊണ്ടിരിക്കുന്നു. ജില്ലയില്‍ നിന്നുള്ള പരിശോധകര്‍ ഇടയ്ക്കിടെ വരാറുണ്ട്.
അന്നൊരു വെള്ളിയാഴ്ച,,,,പത്താം ക്ലാസ്സില്‍ പരിണാമം ചര്‍ച്ച ചെയ്യുമ്പോഴാണ് ഹെഡ് മിസ്ട്രസ്സിന്റെ വിളി…ഓഫീസിലെത്താന്‍…ആരോ ഒരു ഓഫീസര്‍ തിരുവനന്തപുരത്തുനിന്നും ക്ലാസ്സ് പരിശോധിക്കാന്‍ വന്നിട്ടുണ്ട് …ഓഫീസിലെത്തിയ ഞാന്‍ കണ്ടത് ഒരു പുതുമുഖത്തെയാണ്—കറുത്ത് മെലിഞ്ഞ് ഉയരം കുറഞ്ഞ പുരുഷന്‍ കസേരയില്‍ ഇരിക്കുന്നു,അകമ്പടിക്കാരായി രണ്ടു പേര്‍ രണ്ടു വശത്തായി നില്‍ക്കുന്നു..
അവരുടെ മുന്നിലിരുന്ന് പരുങ്ങുന്ന ഹെഡ്ടീച്ചര്‍ എന്നോടായി പറഞ്ഞു,
“ടീച്ചറെ നിങ്ങളുടെ ക്ലാസ്സിലെ നിലവാരവും പഠനരീതികളും ഒന്ന് പറഞ്ഞു കൊടുക്കൂ”,,, എച്ച്.എം.ആകെ ഭയന്നിരിക്കുകയാണ് –വന്നത് ആരെന്നോ എവിടെ നിന്നാണെന്നോ പറഞ്ഞില്ല. ഇതിനിടയില്‍ മലയാളം പഠിപ്പിക്കുന്ന തിരുവനന്തപുരത്തുകാരനായ പിള്ളമാഷ് കൂടി അവിടെ എത്തിയപ്പോള്‍ എനിക്കു ധൈര്യം വന്നു.എന്റെ പ്രവര്‍ത്തനങ്ങള്‍ പറയാനുള്ള അവസരമല്ലേ,
ഞാന്‍ തുടങ്ങി “എന്റെ ക്ലാസ്സിലെ 43 കുട്ടികളുടേയും വീടുകള്‍ സന്ദര്‍ശ്ശിച്ച ശേഷം……….”എന്റെ വിവരണം പകുതിയായപ്പോള്‍ ഓഫീസര്‍ നിര്‍ത്താന്‍ പറഞ്ഞു.
“നിങ്ങള്‍ ചെയ്ത പ്രവര്‍ത്തനങ്ങളെല്ലാം എഴുതിയ ടീച്ചിങ്ങ് നോട്ട് കാണിക്കൂ. എനിക്കു അത് കണ്ടാല്‍ മതി.” ചുരുക്കത്തില്‍ രേഖകള്‍ മാത്രം മതിയെന്ന്.
“സര്‍ അത് എന്റെ ക്ലാസ്സില്‍ വന്ന് പരിശോധിച്ചാല്‍ മനസ്സിലാക്കാം. പാഠഭാഗങ്ങള്‍ മാത്രമേ ടീച്ചിങ്ങ് നോട്ടില്‍ എഴുതാറുള്ളു“.
“അത് മാത്രം എഴുതിയാല്‍ പോരാ; നിത്യേന ചെയ്യുന്ന എല്ലാ പ്രവര്‍ത്തനങ്ങളും നോട്ടില്‍ എഴുതണം.അല്ലാതെ ഇങ്ങനെ ചെയ്താലൊന്നും പ്രയോജനമില്ല.………”. പിന്നീട് ഉപദേശങ്ങളുടെയും ആജ്ഞകളുടെയും പെരുമഴയാണ്.
എല്ലാം കേട്ടപ്പോള്‍ ഞാന്‍ പറഞ്ഞു, “സര്‍, ഇനിയങ്ങോട്ട് നിങ്ങള്‍ പറഞ്ഞത് പോലെ എഴുതാം”.
എന്റെ മറുപടി ഇഷ്ടപ്പെടാത്തത് കൊണ്ടായിരിക്കണം ഓഫീസര്‍ ഹെഡ്ടീച്ചറോടായി അല്പം ദേഷ്യത്തോടെ പറഞ്ഞു,“ഈ ടീച്ചര്‍ കുട്ടികള്‍ക്കായി ഒന്നും ചെയ്യുന്നില്ല. ഒന്നും ശരിയല്ല”.
“സര്‍ അത് ക്ലാസ്സില്‍ പോയി നോക്കിയാല്‍ അറിയാന്‍ കഴിയും. ഈ സ്ക്കൂളിലെ ഏറ്റവും നല്ല ക്ലാസ്സ് ടീച്ചറുടേതാണ്”. ഹെഡ് മിസ്ട്രസ്സ് എന്റെ ഭാഗം ചേര്‍ന്നു. ഇതെല്ലാം കണ്ടുനില്‍ക്കുന്ന പിള്ളസാര്‍ മുന്നോട്ട് വന്ന് ഓഫീസറെ വണങ്ങി.
“സര്‍ ഞാന്‍ ഇവിടത്തെ മലയാളം അദ്ധ്യാപകനാണ്, ഭാഷ പഠിപ്പിക്കുമ്പോള്‍ ഒരു പ്രശ്നമുണ്ട്, അത് പരിഹരിച്ചാല്‍ നന്നായിരിക്കും”.
“പറയൂ ഞാന്‍ പരിഹരിക്കാന്‍ നോക്കാം”.
“അത് സാര്‍ ഇപ്പോള്‍ മലയാളം പാഠപുസ്തകത്തില്‍ സമാസം പഠിപ്പിച്ച ശേഷമാണ് സന്ധി പഠിപ്പിക്കേണ്ടത്; അത് മാറ്റി സന്ധിക്കു ശേഷം സമാസമാക്കിയാല്‍ കുട്ടികള്‍ക്ക് പഠിക്കാന്‍ എളുപ്പമായിരിക്കും”.പിള്ളമാഷ് താണുവണങ്ങി പറഞ്ഞു.
“ഇതു നല്ല നിര്‍ദ്ദേശമാണ്, ഉടനെ മാറ്റം വരുത്താം. ഞാന്‍ തിരുവനന്തപുരത്ത് എത്തിയ ഉടനെ ഈ അഭിപ്രായം പറഞ്ഞ മാസ്റ്റര്‍ക്കു ഒരു അവാര്‍ഡിനു വേണ്ടി റക്കമന്റ് ചെയ്യുന്നുണ്ട്.എന്നാല്‍ ഈ ടീച്ചര്‍ക്കെതിരായി നടപടി വേണം, തീരെ ശരിയല്ല”.
അങ്ങനെ പരിശോധന കഴിഞ്ഞപ്പോള്‍ രണ്ട് നിര്‍ദ്ദേശം ഉണ്ടായി.
- സമാസവും സന്ധിയും നന്നായി പഠിപ്പിക്കുന്ന സാറിന് ഒരു അവാര്‍ഡ് കൊടുക്കണം.
- സ്ക്കൂളില്‍ പഠിപ്പിക്കാന്‍ അറിയാത്ത,ഓഫീസറെ ബഹുമാനിക്കാന്‍ അറിയാത്ത, നിങ്ങള്‍ എന്നു വിളിച്ച് അപമാനിച്ച ടീച്ചറെ ശിക്ഷിക്കണം.ചുരുങ്ങിയത് ഒരു പണിഷ് മെന്റ് ട്രാന്‍സ് ഫര്‍ എങ്കിലും കൊടുക്കണം.
എന്നാല്‍ കാത്തിരുന്നത് പോലെ ഒന്നും സംഭവിച്ചില്ല. വര്‍ഷങ്ങള്‍ കഴിഞ്ഞിട്ടും എന്റെ സംശയങ്ങള്‍ ബാക്കിയാണ്.
***ഞങ്ങള്‍ കണ്ണൂരില്‍ വെച്ച് ബഹുമാനസൂചകമായി നിങ്ങളെ നിങ്ങള്‍ എന്നു വിളിച്ചപ്പോള്‍ അത് തിരുവനന്തപുരത്ത്കാരായ നിങ്ങള്‍ക്ക് എങ്ങനെ അപമാനമായി????
