ഗർഭ…ശ്രീമാൻ

                            ഏറെ നേരത്തെ കാത്തിരിപ്പിന്റെ ഒടുവിൽ പേര് വിളിച്ചപ്പോൾ, ആദ്യം ഭർത്താവും പിന്നാലെ അവളും പതുക്കെ എഴുന്നേറ്റു. ആലസ്യത്താൽ അമർന്നിരിക്കുന്ന ഗർഭിണികളെയും, അവരുടെ വയറ്റിലുറങ്ങുന്ന കുഞ്ഞുങ്ങളെയും ശല്യപ്പെടുത്താതെ, അവളെ മുന്നിൽ നടത്തിക്കൊണ്ട്, തൊട്ട് പിന്നിലായി ആയാളും കൺസൽട്ടിംഗ് റൂമിലേക്ക് പ്രവേശിച്ചു. അകത്തിരുന്ന് എന്തോ എഴുതിക്കൊണ്ടിരിക്കുന്ന ഗൈനക്കോളജിസ്റ്റ്, ‘ഡോ. സുമംഗലി BSc, MBBS, DGO’ തലയുയർത്താതെ പറഞ്ഞു,

“അപർണ്ണ വിശ്വനാഥൻ 19 വയസ്സ്,,,”

“അതെ”

                          കേട്ടത് ആണിന്റെ ശബ്ദമായതിനാലാവണം ഡോക്റ്റർ തലയുയർത്തി നോക്കി, പിന്നെ തൊട്ടടുത്ത് ഇരിക്കാനായി അവൾക്ക് സൂചനനൽകി. അപർണ്ണ ഡോക്റ്ററുടെ സമീപത്ത് ഇരുന്നപ്പോൾ എതിർ‌വശത്തുള്ള കസേരയിൽ, ഭരണകക്ഷിയിലെ നേതാവിനെപ്പോലെ ഇരുന്നുകൊണ്ട് വിശ്വനാഥൻ പറഞ്ഞു,

“ഞാൻ വിശ്വനാഥൻ, ഇത് എന്റെ വൈഫ് അപർണ്ണ”

അവളെ മൊത്തമായി നിരീക്ഷച്ചതിനുശേഷം ഡോക്റ്റർ ചോദിച്ചു,

“ലാസ്റ്റ് പിരീഡ് എപ്പോഴായിരുന്നു?”

“അത്,,”

ഭാര്യ കൂടുതൽ പറയുന്നതിന് മുൻപ് ഭർത്താവ് പറയാൻ തുടങ്ങി,

“അത്, ലാസ്റ്റ് പിരീഡ് എല്ലാദിവസവും 3.25 മുതൽ 4മണി വരെയാണ്; പിന്നെ വെള്ളിയാഴ്ചമാത്രം,,, 

ഡോക്റ്റർ അത് ചോദിക്കുന്നത്?,,,”

ഉള്ളിൽ‌നിന്നും പൊങ്ങിവരുന്ന ചിരിയമർത്തിക്കൊണ്ട് ഡോക്റ്റർ പറഞ്ഞു,

“താങ്കൾ ഒരു സ്ക്കൂൾ മാഷായിരിക്കും, അല്ലെ? ഞാൻ ചോദിച്ചത് മെൻസസ് പിരീഡിനെക്കുറിച്ചാണ്. അപർണ്ണയുടെ ലാസ്റ്റ് മെൻസസ് ഡെയ്റ്റ്?”

“മാർച്ച്”

അവൾ പറയുന്നതിനു മുൻപ് ആയാൾ ബാക്കി പൂരിപ്പിച്ചു,

“11. 3. 2011ന് വെള്ളിയാഴ്ച രാത്രി 11 മണിക്ക്,,,, പിന്നെ ഞാൻ വിചാരിച്ചു,,,”

“അതുവരെ നോർമലാണോ?”

“ഇതുവരെയും ഇവൾ നോർമൽ തന്നെയാ ഡോക്റ്ററെ”

“ഞാൻ പറഞ്ഞത് പിരീഡ്സ് നോർമലാണോ എന്നാണ്”

“കല്ല്യാണത്തിനുശേഷം കഴിഞ്ഞ മാർച്ച്‌വരെ അതെല്ലാം വളരെ നോർമൽ തന്നെയാണ് ഡോക്റ്റർ, അതിന് മുൻപത്തെക്കാര്യം എനിക്കറിയില്ല”

“അപ്പോൾ മൂന്ന് മാസമായല്ലൊ?”

“ആയിരിക്കണമല്ലൊ”

ഡോക്റ്ററുടെ ചോദ്യത്തിന് അയാൾ മറുപടി പറഞ്ഞു.

“അപർണ്ണക്ക് ഭക്ഷണം കഴിക്കുമ്പോൾ എന്തെങ്കിലും പ്രയാസം?”

ഡോക്റ്റർ അപർണ്ണയെ നോക്കി ചോദ്യം തുടർന്നു.

“അത് ഡോക്റ്റർ എനിക്ക് ചർദ്ദി…”

ബാക്കി പറഞ്ഞത് അയാളാണ്,

“എന്റെ ഡോക്റ്ററെ ചർദ്ദി എന്ന്‌വെച്ചാൽ,,, ഇങ്ങനെയൊരു വാള് എന്റെ ജീവിതത്തിലിതുവരെ കണ്ടിട്ടില്ല. ചോറ് അടുപ്പത്ത്‌നിന്ന് തിളക്കാൻ തുടങ്ങുമ്പോൾ തുടങ്ങും ഇവളുടെയൊരു ഒടുക്കത്തെ ചർദ്ദി, പിന്നെ സാമ്പാറ് വെച്ചാലുള്ള കാര്യം പറയാത്തതാ നല്ലത്. മനുഷ്യനെ മെനക്കെടുത്തുന്ന ഈ വക കാര്യങ്ങളൊന്നും മറ്റാർക്കും ഉണ്ടായിട്ടില്ലെന്നാ എന്റെ അമ്മ പറഞ്ഞത്”

“എന്തൊക്കെയാ ഡയറ്റ്?”

“ഈ ഡയറ്റിനെക്കൊണ്ട് ടീച്ചേർസിന് ദോഷമല്ലാതെ, ഒരു ഗുണവും ഉണ്ടായിട്ടില്ല; പിന്നെ ‘ടി.എ’ പണമായിട്ട് കൈയിൽ കിട്ടുന്നതുകൊണ്ട് ക്ലാസ്സിൽ പങ്കെടുക്കുന്നു, എന്ന്‌മാത്രം”

“എന്തൊക്കെയാ പറയുന്നത്? അപർണ്ണയുടെ ഭക്ഷണക്കാര്യമാണ് ചോദിച്ചത്”

“ഓ അതാണോ? പച്ചമാങ്ങയും ചിക്കൻ ഫ്രൈയും വേണമെന്ന് എപ്പോഴും പറയും”

“എന്നിട്ട് അതൊക്കെ കഴിക്കാറുണ്ടോ?”

“അതൊക്കെ എങ്ങിനെ കഴിക്കാനാണ്? പച്ചമാങ്ങ വീട്ടിലെ മാവ്‌നിറയെ ഉള്ളത് കൊതിയോടെ നോക്കാറുണ്ടെങ്കിലും, മാവിൽ കയറാൻ ആളില്ലാത്തതുകൊണ്ട് ഇതുവരെ കിട്ടിയിട്ടില്ല. പിന്നെ എന്റെ അമ്മക്ക് ഇഷ്ടമില്ലാത്തതുകൊണ്ട് ചിക്കൻ പോയിട്ട്, നമ്മുടെ നാടൻമത്തിപോലും വീട്ടിനകത്ത് കടത്തിയിട്ടില്ല”

“അപ്പോൾ ഇങ്ങനെയുള്ള നേരത്ത് അമ്മയുടെ ഇഷ്ടമാണോ നോക്കേണ്ടത്?”

“മക്കൾ, അമ്മപറയുന്നത് അനുസരിച്ചല്ലെ ജീവിക്കേണ്ടത്. എന്റെ അമ്മ എട്ട് പെറ്റതാ, അവർക്കൊന്നും ഒരു പ്രയാസവും ഉണ്ടായിട്ടില്ല. ഇവൾക്കാണെങ്കിൽ തുടക്കത്തിലെ ഓരോ പ്രശ്നങ്ങളാണ്”

“എന്നാൽ‌പിന്നെ ഒൻപതാമതായി ഇതും പ്രസവിക്കാൻ അമ്മയോട് പറഞ്ഞുകൂടായിരുന്നോ?”

ഡോക്റ്റർ പറഞ്ഞത് അയാൾക്ക് മനസ്സിലായില്ലെങ്കിലും മനസ്സിലായി.

“അപർണ്ണക്ക് എന്തെങ്കിലും പ്രയാസം ഉണ്ടായൊ?”

“അവൾക്കെന്ത് പ്രയാസം? പ്രയാസമൊക്കെ എനിക്കല്ലെ; കാല് വേദന, കൈ വേദന, പുറം വേദന എന്നൊക്കെ പറയുന്നതുകൊണ്ട് സമയത്ത് ഭക്ഷണംതരുന്നില്ല, വസ്ത്രങ്ങൾ അലക്കി ഇസ്ത്രി വെക്കുന്നില്ല,,, പിന്നെ,, എന്റെ കാര്യങ്ങളിലൊന്നും ഒരു ശ്രദ്ധയുമില്ല. ഞാനൊരാണല്ലെ ഡോക്റ്റർ?”

“ആണാല്ലൊ, അതുകൊണ്ട് അപർണ്ണക്ക് ശാരീരികവിഷമങ്ങൾ എന്തെങ്കിലും?”

“അത് അവളുടെ ഇടത്തെകാലിൽ അല്പം നീര് വന്നിട്ടുണ്ട്, നടക്കുമ്പോൾ വലതുകാൽമുട്ട് വേദനയും ഉണ്ട്”

അയാൾ സ്വന്തം കാൽമുട്ട് കാണിച്ചുകൊണ്ട് പറഞ്ഞു.

“അനക്കം തോന്നാറുണ്ടോ?”

“രാത്രിനേരത്ത് വെളിയിലെന്തെങ്കിലും അനക്കമുണ്ടായാൽ ഉടനെ എഴുന്നേറ്റ് ലൈറ്റ് ഓൺ ചെയ്യുന്ന സ്വഭാവം ഇവൾക്ക് പണ്ടേയുണ്ട്”

“ഞാൻ ചോദിച്ചത് വയറ്റിൽ കുട്ടിയുടെ ചലനം ഉണ്ടോ, എന്നാണ്”

“ഓ അതാണോ?”

അയാൾ ഇടതുകൈകൊണ്ട് സ്വന്തം വയർ തടവിയിട്ട് പറയാൻ തുടങ്ങി,

“രാത്രിയിൽ കിടന്നിട്ട്, ഉറക്കം വരാൻ തുടങ്ങുമ്പോൾ അടിവയറ്റിന്റെ വലതുവശത്ത് നേരിയ അനക്കം ഉണ്ടാവും. പിന്നെയത് ഇടതുവശത്തേക്ക് പതുക്കെ സഞ്ചരിക്കും, അങ്ങോട്ടും ഇങ്ങോട്ടുമായി മൂന്ന് തവണ. പിന്നെ താഴോട്ട് ചെറിയ മുഴപോലെ ഇടയ്ക്കിടെ, ദെ,, ഇങ്ങനെ പൊങ്ങും. മൂന്ന് മാസമായപ്പോഴെ പയ്യൻ ഫുഡ്‌ബോൾകളി പരിശീലിക്കുകയാ,,, ഡോക്റ്റർ ഇങ്ങനെ എല്ലാവർക്കും ഉണ്ടാവുമോ?”

“ഉണ്ടാവണമല്ലോ,,, അതെല്ലാം നല്ല ലക്ഷണങ്ങളാണ്. ഇനി ഞാനൊന്ന് പരിശോധിക്കട്ടെ,”

ഡോക്റ്റർ എഴുന്നേറ്റ് കൈകഴുകി; പിന്നീട് ഒരു പുതുപുത്തൻ കൈയ്യുറ പുറത്തെടുത്തിട്ട് വലതുകൈ ആ ഉറക്കുള്ളിൽ കടത്തിയശേഷം ഭാര്യയോട് പറഞ്ഞു,

“അപർണ്ണ അല്പസമയം വെളിയിൽ നിൽക്ക്,,, വിശ്വനാഥൻ ഈ ടേബിളിൽ കിടന്നാട്ടെ, ”

“അത്,,, ഞാനെന്തിനാ ഡോക്റ്ററെ?”

അയാൾക്ക് സംശയമായി.

“ആദ്യം കുഞ്ഞിന്റെ കിടപ്പ് ശരിയാണോ എന്ന് നോക്കട്ടെ, സ്കാൻ ചെയ്യുന്നതൊക്കെ പിന്നീടാവാം”